सात सेहनते वाम दहिन, फाटल कोंढ़ सीबै छी

सात सेहनते वाम दहिन,
फाटल कोंढ़ सीबै छी
------------------------------------------------
सते त टुकुर टुकुर देखै छी हुकुर हुकुर जीबै छी
ने इस्स करै छी नै उस्स, लोक कहै कि जीबै छी

बिन छूनौ छनछनाई छी अपने मन स लीबै छी
अपने मन स डोलै छी आ बिन आगिए धीपै छी

लोक कहै जे अखज मरे ने छूतहर फूटे, जीबै छी
सात सेहनते वाम दहिन, फाटल कोंढ़ सीबै छी

काँच-पाकल जे भेटल से हबैक-हबैक क गिरै छी
किछ नै सूझे तैयो जे सदिखन आँखि के मिरै छी

सात सेहनते वाम दहिन, फाटल कोंढ़ सीबै छी
सते त टुकुर टुकुर देखै छी, हुकुर हुकुर जीबै छी